ஒடிசா கடற்கரையில் பிரளய் ஏவுகணைகள் வெற்றிகரமாக சோதனை / Pralay missiles successfully tested off the Odisha coast

பாதுகாப்பு ஆராய்ச்சி மற்றும் மேம்பாட்டு நிறுவனம் (டி.ஆர்.டி.ஓ), ஒடிசா கடற்கரையிலிருந்து 2025 டிசம்பர் 31 அன்று காலை சுமார் 10:30 மணியளவில், ஒரே ஏவுதளத்திலிருந்து அடுத்தடுத்து இரண்டு 'பிரளய்' ஏவுகணைகளை வெற்றிகரமாக ஏவி சோதனை செய்தது.

பயனர் மதிப்பீட்டு சோதனைகளின் ஒரு பகுதியாக இந்த விமான சோதனை நடத்தப்பட்டது. இரண்டு ஏவுகணைகளும் திட்டமிடப்பட்ட பாதையைப் பின்பற்றி, அனைத்து இலக்குகளையும் எட்டியதை ச சந்திப்பூரில் உள்ள ஒருங்கிணைந்த சோதனைத் தளத்தின் (ஐ.டி.ஆர்) கண்காணிப்பு சென்சார்கள் உறுதி செய்தன.

ஏவுகணைகள் இலக்கைத் தாக்கிய இறுதி நிகழ்வுகள், கடலில் இலக்குப் பகுதிகளுக்கு அருகில் நிலைநிறுத்தப்பட்டிருந்த கப்பல்களில் உள்ள டெலிமெட்ரி அமைப்புகள் மூலம் உறுதிப்படுத்தப்பட்டன.

'பிரளய்' என்பது உள்நாட்டிலேயே உருவாக்கப்பட்ட, திட எரிபொருளால் இயங்கும் 'குவாசி-பாலிஸ்டிக்' ஏவுகணையாகும். இது மிகத் துல்லியமான தாக்குதலை உறுதி செய்ய அதிநவீன வழிகாட்டுதல் மற்றும் வழிசெலுத்தல் தொழில்நுட்பத்தைப் பயன்படுத்துகிறது.

இந்த ஏவுகணை பல்வேறு இலக்குகளுக்கு எதிராகப் பல வகையான போர்த் தளவாடங்களை (Warheads) சுமந்து செல்லும் திறன் கொண்டது.

இந்த ஏவுகணை, ஐதராபாத்தில் உள்ள இமாரத் ஆராய்ச்சி மையம் (ஆர்.சி.ஐ), டி.ஆர்.டி.ஓ-வின் பிற ஆய்வகங்களான பாதுகாப்பு ஆராய்ச்சி மற்றும் மேம்பாட்டு ஆய்வகம் (டி.ஆர்.டி.எல்), மேம்பட்ட அமைப்புகள் ஆய்வகம் (ஏ.எஸ்.எல்), ஆயுத ஆராய்ச்சி மற்றும் மேம்பாட்டு நிறுவனம் (ஏ.ஆர்.டி.இ), உயர் ஆற்றல் பொருட்கள் ஆராய்ச்சி ஆய்வகம் (ஹெச்.இ.எம்.ஆர்.எல்), பாதுகாப்பு உலோகவியல் ஆராய்ச்சி ஆய்வகம் (டி.ஆர்.எம்.எல்), முனையப் பலிஸ்டிக்ஸ் ஆராய்ச்சி ஆய்வகம் (டி.பி.ஆர்.எல்), ஆராய்ச்சி மற்றும் மேம்பாட்டு நிறுவனம் (பொறியாளர்கள்) மற்றும் ஒருங்கிணைந்த சோதனைத் தளம் (ஐ.டி.ஆர்) ஆகியவற்றின் ஒத்துழைப்புடன் உருவாக்கப்பட்டுள்ளது.

மேலும், பாரத் டைனமிக்ஸ் லிமிடெட் (பி.டி.எல்) மற்றும் பாரத் எலக்ட்ரானிக்ஸ் லிமிடெட் (பெல்) ஆகிய வளர்ச்சி மற்றும் உற்பத்திப் பங்காளிகள் மற்றும் பிற இந்தியத் தொழில்துறையினரின் பங்களிப்பும் இதில் உள்ளது. இந்தச் சோதனைகளுக்காக, மேற்கூறிய இரண்டு உற்பத்திப் பங்காளிகளால் அமைப்புகள் ஒருங்கிணைக்கப்பட்டன.

இந்தச் சோதனைகளை டி.ஆர்.டி.ஓ மூத்த விஞ்ஞானிகள், இந்திய விமானப்படை மற்றும் இந்திய ராணுவத்தின் பிரதிநிதிகள் மற்றும் தொழில்துறை பிரதிநிதிகள் நேரில் பார்வையிட்டனர்.